السلتا كورس بيدرب مدرسين الانجليزي على طرق التدريس الحديثة بتقدمه جامعة كامبريدج من خلال مراكزها المعتمدة حول العالم. يعني تعتبر كورس #TEFL أو #TESOL ولكن جامعة كامبريدج حبت تدي إسم مميز لكورس التفل الخاص بيها وتعمل منه براند لا يحق لأي مؤسسة غيرها استخدامه.

 

 

تقدر تاخد #CELTA في أحد مراكز كامبريدچ المعتمدة حول العالم.. وخد بالك لأن من كام سنة فيه مركز ادعى إنه بيقدم سلتا ونصب ع الناس فلازم تتأكد إن المركز موجود على موقع كامبريدج(هتلاقي لينك الجامعة هنا) ، بتدخل إسم الدولة وبتختار CELTA فبيطلعلك أسماء المراكز اللي اعتمدتها كامبريدج في الدولة اللي إنت اخترتها

☆ Find a verified center ♡↡

 

 

فيه ٣ مراكز ثقة معتمدة من كامبريدج في القاهرة و مركزين في إسكندرية

القاهرة:

– Future University in Egypt (I currently work there, full-time)

– International House Cairo (I work there part-time)

– British Council – Agouza branch

إسكندرية:

– Pharos University

– Arab Academy

جامعة كامبريدچ حاطة شرطين أساسيين للقبول.. أولهم السن يكون فوق 18 سنة.. و التاني اللغة تكون مستوى متقدم C1 أو ما يعادل IELTS 7.5 (مش لازم شهادة أيلتس .. احنا بنقيم مستوى اللغة أثناء الانترفيو)

أول خطوة في التقديم إنك بتملى application وبعدها السنتر بيبعتلك pre-interview task تحلها وأنا في الفيديو ده شارح محتوياتها بالتفصيل وقايلك ايه المتوقع منك عشان تعدي الانترفيو وتتقبل في الكورس.

 

لو عديت من الانترفيو هيبعتولك إيميل بالقبول ( أنا أحيانا كتير بحب أفرح الناس وأقولهم نتيجة الانترفيو قبل ما يمشوا).. والمفروض بتكون موقع على أوراق بتقر فيها إنك مش هتعمل plagiarism وهتتصرف باحترافية وهتتقبل الفيدباك من المدرب ومن زملائك في الكورس لأن الكورس مش بس بيطور مهاراتك في التدريس بشكل فردي، لا.. ده كمان بيعلي مقدرتك على تحليل وتقييم الدروس الأخرى لزملائك.. ودي بنسميها peer observation.. فلو مش هتقدر تسمع رأي زمايلك بصدر رحب وتقدرهم زي ما بتقدر المدرب.. هيتحطلك الكلام ده في التقرير كنقطة محتاج تشتغل عليها وتحسنها.. ال teamwork مهم جدا في السلتا.

مفيش امتحان!

إنت بتشرح ٦ ساعات متقسمين على ٨ مرات، غالبا كل مرة ٤٥ دقيقة وبتشتغل مع طلبة حقيقيين و المدرب بيقيمك وبيديلك feedback عن نقط القوة والضعف في شرحك ولازم تنجح في معظم الدروس اللي بتشرحها وتنجح في ال تلاتة assignments من أصل اربعة اللي هما إجمالي ٤٠٠٠ كلمة بيتكتبوا خلال مدة الكورس!

نجاحك مبني على التقييم النهائي لكل الحاجات دي مجتمعة.. ونسبة النجاح عالية جدا بتوصل ل ٩٧٪ أو آكتر.. يعني ٣ بس أو أقل من كل ١٠٠ شخص بيسقطوا.. بعد الشر عنك يعني!

 

4 أسابيع: لو مكثف (من الأحد للخميس من ٩ ص ل ٦م) محتاج تفرغ كامل لأن حتى لما ترجع البيت هتشتغل على ال lesson plans و ال assignments وال language analysis sheets

10 أسابيع: لو بدوام جزئي ( غالبا جمعة وسبت فقط أو مساءا أيام الأسبوع) وخد بالك من إنك هتحتاج تنظم وقتك جدا لو بتشتغل طول الاسبوع لأنك هتحتاج من 10 ل 20 ساعة خلال الاسبوع (جنب شغلك) عشان تخلص اللي هيتطلب منك في السلتا.. معظم الناس بتوصل الخميس وتتزنق جامد وميلحقوش.. فخد بالك جدا عشان الكورس ميروحش منك!

خد بالك من حاجة مهمة جدا.. الكورس مش صعب على أد ما هو محتاج حد بيعرف ينظم وقته كويس جدا.

 

أنا زمان لاحظت إن الكورس سعره بيتحرك زي الآيفون بالظبط! ويمكن الكورس كان أغلى شوية من الآيفون..

أنا خدت الكورس في 2015.. كان ب 1200 ج إسترليني في ITI Istanbul .. سعر الاسترليني وقتها كان بين 12 ج و 15 ج مصري تقريبا! وغالبا لسه بنفس السعر!

وقت كتابة البوست ده (2022).. الكورس ب 28000 جنيه مصري.. (مازال في iti ب 1200 إسترليني)

حصل تعويم للعملة والكورس رفع ل ٣٥ ألف.. وبيتكلموا على تعويم تاني وهنسمع ٥٠ ألف وهيعديها كمان.. لنا الله! (مازال في iti ب 1200 إسترليني)

ملحوظة: البوست بيتعدل كل فترة عشان أحدث السعر الجديد!

الكورس حاليا (بداية من أبريل ٢٠٢٤) بيتراوح ما بين 44000 و 50000 جنيه مصري ومرشح للزيادة عشان مربوط بالجنيه الاسترليني!

طب ليه السعر ده؟ طبعا لسببين.. أولهم، قوة المحتوى وأنه بيخليك مدرس شديد المهارة.. ثانيهم، قوة الشهادة اللي بتفتح لك باب الانترفيو في أكبر الأماكن.. وعشان مكونش بديك وعود براقة.. الأرزاق بيد الله.. أنا نفسي قعدت ٥ شهور مش لاقي شغل بعد ما خلصت السلتا، ولكن أول ما جت فرصة كنت جاهز لها!

طيب عندك كذا موقع تقدر تسجل عليهم وتبص على فرص العمل ومتطلباتها و الرواتب للحاصلين على السلتا منهم

https://www.tefl.com/

https://www.eslcafe.com/

بفضل الله وعشان أنا مدرب سلتا معتمد من كامبريدچ أنا عملت كورس إسمه #CELTA_Preparation وده كان أول كورس تحضيري للسلتا في مصر!

عملت الكورس ده وأنا بفكر في الزملاء:

حديثي التخرج اللي لسه متوفرش معاهم موارد مالية تغطي تكاليف كورس السلتا نفسه، وعايزين يتعلموا صح وياخدوا محتوى يوقفهم على رجلهم في الكلاسروم يأدوا أداء محترف ويشتغلوا ويحوشوا وياخدو سلتا واسمهم يكبر.

المقبلين على كورس السلتا نفسه وعايزين يفهموا الدنيا فيها أيه وأيه اللي هما مقبلين عليه وأيه المتوقع منهم فميحصلش المعاناة اللي حصلت لي شخصيا وأنا طالب سلتا! فيعلوا نسبة نجاحهم بفضل الله.

ممكن تاخد جولة في reviews الصفحة هنا ↡ وتشوف رأي المتدربين الل خدوا الكورس معايا

https://www.facebook.com/share/p/5GCigMMbBv1LzzD9/ 

 

((التقديم ليه سهل وسعره بسيط وال application خفيفة و نادين هتساعدك في الخطوات وده الواتساب بتاعها ابعتلها رمز CP وهي هتساعدك بخطوات التسجيل wa.me/201095085588))

𝐂𝐄𝐋𝐓𝐀 𝐏𝐫𝐞𝐩𝐚𝐫𝐚𝐭𝐢𝐨𝐧

https://teflism.co.uk/courses/celta-preparation/

https://teflism.co.uk/courses/tefl/

 

لو لسه عندك سؤال عن السلتا سيبهولي في التعليقات وإن شاء الله اجاوبه وازوده ع البوست!

وده جروب على الواتساب، كل ما يكون عندي خبر عن كورس CELTA هيبدأ.. هبعت عليه إن شاء الله

و خدها قاعدة في حياتك، إن ربنا بيكرم كل اللي بيسعى وبيجتهد وبيستثمر في نفسه صح حتى لو الرزق أتأخر.. هييجي هييجي لأن ده وعد ربنا .. أوعى تقعد تحوش سنين عشان في الاخر تجيب آيفون! هتجيبه من مرتبك لو استثمرت فلوسك صح.. ربنا يفتح علينا وعليك ويوسع رزقك إن شاء الله.. قولوا آمين

𝗖𝗘𝗟𝗧𝗔 𝗧𝘂𝘁𝗼𝗿 | 𝗖𝗮𝗺𝗯𝗿𝗶𝗱𝗴𝗲 𝗔𝘀𝘀𝗲𝘀𝘀𝗺𝗲𝗻𝘁

𝗙𝗼𝘂𝗻𝗱𝗲𝗿 | 𝗧𝗘𝗙𝗟𝗶𝘀𝗺